Asai Mula Guha Tujôh (TAMAT)

Gamba geuceuë lé Mikmilia

“Bukôn keuh mureuëd di kamoë meunan, tapi neutém keuh sayang keu rakan kamoë nyang sakèt di ateuh glé jéh. Keu kamoë adak hana neupakoë hana keuh dalèh, tapi neubri keuh makanan ubéna mudah keu rakan kamoë jéh nyang teungoh sak-dak nyan,”seuôt Keutua nyan ngon haté rangoë. Ureuëng inông nyan tan geupakoë, gaséh ngôn sayang ka leukang lam dada jih. Hana teuka weuh meusigeutu. Jibéb jidhôt jiyuë minah, leuh nyan jibeurangkat jigrak gaki. Ureuëng laèn pih meunan hi, hana sayang keu aneuk agam nyang teungoh apôh-apah nyan.

Kheun Keutua bak awak nyan, “Bah ta gisa u glé klayi rakan e, meunoë that hi ureuëng di sinoë. Keudéh nibak Allah ta mohôn pinta, beugeubri jalan kiban nyang jroh keu geutanyoë bandum.”

Akhé jih awak nyan ban nam sigra jiriwang. Ngon reu’oh-reuah laju jiék gôh manyang meubatèe kareuëng. Ho nyang geupandang meuhalak luah barieh meubanja. Cukôp ceudah leumah bak mata. Bah pih pruet deuk ngôn grah, leumah peumandangan lagèe nyan jeuët keuh keu ubat mata. Trép geuseutot rot ueh woë sampoë uroë ka sinja. Watèe meusapat ngôn rakan nyang sakét nyan geurawi ulang kisah seudéh nyang meukaleuëng u ateuh awak nyan.

“Ta saba mantong hai ngôn meutuah, di balék nibak nyan teuntèe na hikmah nyang Allah neuk peunyata,” seuôt rakan nyang sakét hana putôh asa.

“Alèh kiban, hana peu-peu lé badan lôn nyoë. Sang ka mangat, ka teuga lagèe awai dilèe. Nyô singôh sihat, jeuët ta beurangkat laju,” sambông narit ngôn nyang sakét nyan teutap gléh ië muka geuh. Rakan nyang la’én seunang geurasa. 

Malam pih sigra teuka. Aneuk muda nyoë teungeuët pansan saweub hèk raya. Sulôih nyang akhé awak nyan ka jaga, ka ladém geuseumanyang sampoë fajar teuka. Teungôh geuibadat geupujoë Allah, teuka keuh geumpa nyang sép teuga. Bumoë meuayôn meuputa-puta, sigo meusinyôk sigo rata, sang-sang neuk reubah ancô reulé, lham binasa. Awak nyoë ban tujôh gét that teumakôt, leumôh teuôt yo beukon lé. Geumeuratéb geulakèe lindông nibak bala raya nyan. Na trép siat, ngôn teukeudi Tuhan, geumpa pih sungap, bumoë sunguë klayi lagèe beunoë, lagèe hana leuh bala.

Beungôh jih mata uroë teubiet reudèe, angèn jipôt leupië lam tuleuëng. “Jak ta saweu u gampông nyang baroë awak gata teumèe. Soë teu’ôh awak nyan peureulèe bantuan geutanyoë saweub geumpa beuklam teuga lagoina,” bri usôlan rakan nyang saket nyan. Awak nyang laèn pih sama anggôk hana dawa. Sigra geulangkah awak nyan tujôh, langsông jitrôn gôh ngôn barieh nyang meuriti meubanja-banja. Nyô baroë geurasa jeuôh gampông nyan, tapi kali nyoë sang cit di keuë mata. Na siat trôh keuh aneuk agam nyoë u gampông nyang ceudah seureuta gléh nyan.

“Astaghfirullaah!” Tujôh aneuk muda nyoë teuklik teukeujôt.  Teutahé teuhireun peu nyang leumah dikeuë mata awak nyan. Rumoh nyang baroë jikalon dhiet that, ka meugantoë hi ka jeuët keu batèe kareuëng seureuta guha. Meunan cit ureuëng meusidroë hana leumah, ka habéh  jeuët keu batèe bandum.

“Ya Allah kamoë meulakèe ampôn!” tubiet su ureuëng nyan ban tujôh. “Ci ta rawôn-rawôn, soë teu’ôh na nyang jeuët ta tulông,” kheun sidroë ureuëng nyan mantong ngôn ië muka teumakôt. Jak keuh aneuk muda nyoë geukeuliléng gampông. Trôh keuh awak nyan bak saboh rumoh nyang leupah rayeuk. Nyan keuh rumoh ureuëng kaya nyang geukhanduri peukawén aneuk. Di keuë rumoh nyan mantong na lumô meugeurugôh, geuneuk sië bak uroë laén kareuna acara jih tujôh uroë tujôh malam. Sayang jih, lumo gap nyan kajeuët keu batèe. Meunan cit rumoh raya nyan ka meuubah ujud keu guha batèe.

Aneuk muda tujôh nyoë geutamông geujak pareksa. Beutôi keuh nyang geusangka beunoë kareuna lam rumoh nyan na sijudô lintô ngôn dara barô di công peulamin nyang kajeuët keu batèe. Awak nyan geuistighfar lé geulakèe ampôn nibak Po Sidroë. Leuh nyan geutrôn laju bak tingkat phôn rumoh nyang ka lham keudéh lam tanôh.

Gét that teukeujôt ôh ka geutamông nibak tingkat phôn. Ramèe aneuk mièt di sinan teutahé ganté, teubangai keudroë lagèe gadoh ingat. Timang di ateuh ulèe aneuk miet nyan, meugantung batèe nyang cukôp raya. “Mungkén lampu Kristal meugah nyang ka jeuët keu batèe gantung nyoë,” teus’ah lam hate awak nyan. Aneuk muda nyoë geutanyông, pakon aneuk miët nyan na di sinan. Seuôt sidroë lam kawan lé nyan, “Hana ngôn peugah hai Teungku meutuah, beuklam geumpa meuayôn donya. Hana meuteu’ôh pakriban cara, ban meupeuhah mata ka na kamoë di sinoë, di miyup batèe meugantung nyoë.”

“Meunyô meunan hai adoë bandum, jak ta ikôt kamoë u luwa, poma ngôn abu gata hana lé, ka keuheundak Po habéh jeuët keu batèe.”  Meunan jideungô tutô haba nyan, jimoë ba’é aneuk manyak nyan jiklik ngôn su raya. Aneuk muda nyoë jiilah-daya, jipeuteunang ngôn jipeuseungap sampoë aneuk manyak nyan hana lé rô ië mata.

Uroë meugantoë cit hana meurasa, nibak Aleuhad hingga Seunanyan. Meunan cit buleun jisalôp masa, nibak Asan Usén jinoë ka Puasa. Meunan keuh meuputa-puta watèe, aneuk manyak nyan jipeureunoë beuët, jipeureunoë meubaca, jipeureunoë teumuléh. Meunan cit jipeureunoë teumaguen sampoë meuphôm lagi mahi. Watèe trôh buka puasa, cit ka teuhidang meunakeun nyang mangat-mangat, si ulah-ulah na sidroë dèndayang nyang peusiap peunajôh mangat nyan.   

Nibak saboh jan, kheun keuh Keutua aneuk muda tujôh nyan, “Aneuk miet meutuah asoë syuruga bandum, kamoë neuk tamông keudéh u dalam. Awak gata tinggai di luwa, tameujroh-jroh sabé keudroë-droë. Mungkén trép kamoë meugisa, alèh sithôn atawa dua. Saweub hajad di kamoë beutrôh. Yôh awai di gampông meunan kamoë meukasad.” Uroë buleun bak watèe nyan nakeuh buleun Meuapét atawa Zulqaidah, uroë ureuëng jak pubuet rukôn u tanôh suci nyang puncak jih timang bak buleun Aji atawa Zulhijjah.

Akhé jih aneuk muda ban tujôh nyoë geutamong lam guha nyan ngôn pintô nyang meubiza-biza. Tujôh ureuëng nyan maséng-maséng geupiléh pintô tamong keu droë. Aneuk miet di luwa jiprèh ngôn cukôp saba. Watèe langét ka mirah siblah rot barôh, aneuk miet nyoë han ék jitheun haté lé. Jitamong bagah u dalam guha, jijak mita dalém nyang tujôh nyan. Tapi peu nyang jimita hana meureumpok lé, aneuk muda nyang jroh peurangui nyan, nyang kajeuët keu gurèe seureuta ureuëng chik awak nyan ka gadoh ka guha seuba, gaéb hana meuhoka. Malam jih, aneuk manyak nyan bandum meulumpoë keu aneuk muda nyang gét peurangui nyan. Lam lumpoë nyan awak nyan tujôh geuwasiet bak aneuk miet nyan, “Hai aneuk miet geunaséh Po, meubèk lé tamita kamoë nyoë, saweub di kamoë teungôh meupubuet rukôn di tanôh suci. Tameujroh-jroh sabe keudroë-droë, tapakoë keu agama.”

Meunan keuh paneuk haba, aneuk manyak nyoë jimeuudép sabé keudroë-droë sampoë teuka ureuëng laèn nyang cok awak nyan. Haba aneuk muda tujôh jèh nyang ék aji, ka meusyuhu ban saboh donya. Ramé trôh teuka ureuëng laén nyang neuk ngui peukateun lagèe aneuk muda tujôh nyan. Tapi hana sidroë nyang beutoi trôh u Ka’bah mulia. Alèh mungkén pintô guha nyan ga geugunci keu geutanyoë bandum. (Seuleusoë)

(Meu’ah nyô calitra nyoë meutamah atawa meukureuëng dari nyang beutoi ureuëng tuha calitra. Lom, na meubagoë jeunéh atawa pèrsi hikayat Guha Tujôh nyang geututô lé ureung tuha awai). 

Baca Juga:

• Asai Mula Guha Tujoh (Part 1) 
• Siti Geulima dan Legenda Dua Paya di Padang Tiji
• Cerita Legendaris Pencuri Tujuh, Tercuri Part 1
• Cerita Legendaris Pencuri Tujuh, Tercuri (TAMAT)
• Viral dan Misterius! Di Sinilah Kampung Kuno Suku Mante